'Lamkhat A Zawhti Mi Hawikom' Part |||

      ‘Khah! tam tuk in ding hlah uh! khual le vei an tam tuk hih nungak hmai ah kan mualpho lai.’ ka cohmi ka chiah pah in ka chimhhrin hna kan ti lai maw keimah tu hi ka chung a lin cang deuh bia dek. ‘Aaa, Kawi Thawng na timi a tam tuk cang. Zetlan zeih cu si kho rih lai lo hih hitluk khual le upa min ngei tampi zong um lio ah.’ Mang

Dun nih awnem nawn khin bia riak a chiah taak. Kan i za pah ko hna i a tangmi hi thaizing lufah dawn ah seh kan i chiah tiah keimah nih a thli tein ka thuk kanh hna. Cu lo ahcun, an zun ceh tiang a ding ding phun in an thutning a fek, tho hrim zong an i zal ruam lo. A dih hlan lo tiding ah an ruah. Kunya cawknak hmanh an ngei huaha ti lo. Kan phiarnak le kan nungak danghnak ah kan thaw a sa ngai cang. ‘Hodah Kunya cawk lai. Kei ka dih cang hih! Ka tawro in kan thutpi sawh ko hna hi’, Mang Dun a cal a hung sen ngai cang. Zeidang hmanh a tuak kho ruam lo. Tho i Mi Te Kunya dawr i thut pah Kunya sen tung in khai, nungak ra mi a dawh maw dawh lo tuzan leng awk ah tiah ngiat lawng khi a ruah kho cang. Kawi Thawng nih ‘Kaiza deuh lo, Kaa khat in vun hmawm rih ning law kai za bak si lai.’ Khah ne, na zu ram hi ka dua, aaa.. That Cin nih a thuhmi a va lak than. Caan tlawmpal ah, ‘Puai kan thawk cang lai. Zuamnak phunphun a um lai. Laksawng zong tampi an thap hih nungak le tlangval, khual he lai he rak chuak cang u law.’ kan khua koko ahcun capo saih a thiam lawng si loin, a mui zoh ah voikhat tal cu nih ta nak ding in a ummi, Khup Luai a hung au lulhmalh. 'Kal hna sih,! kal hna sih!. Kan zuthawl hmanh tha in kan thuh manh lo.

      Thingkung kai zuamnak, hri hnuh zuamnak, zawngte ti ding zuamnak, thirfung khawh zuamnak, lungcheh zuamnak, a zuamnak phun hi a tam kho taktak. pakhatnak laksawng nih hin Pia khat cu a phiar kho diam fawn. Kanmah lak ahcun, Kawi Thawng dah ti lo cu pakhatnak ai cuh ding hi kan um hraw lo. Mang Dun van ti ah le khual lei in a thawngthawng lawngte cu si hna kaw a chuak ngam ding phun hmanh in a mit aa au ti lo. ‘Kawi Thawng, Van Dam, kuah. a chehnak a hlat ngamsam’. kan hung au ulh. Khual lei a thawng an timi pa nih a chehnak hmun a zoh ah a sungkhan colh. ‘Pia khat,’ Mang Dun nih a au pah in Kawi Thawng laksawng a va lak piak. Amah vanthat kan ti hnga maw a fuhsual kan ti hnga hme Than Tlang lei in Yangon ah aum deuhmi nungak Dar Sui an timi he an mit ai tong ngelcel ngai. Lungbo zong ai chuih phah dih a zoh tuknak ah. Kan sin a hun phanh cu a mit a maw. A thintur hi thang ial. A falet tuk lionak i a thin nak hmanh in atu hi a lin zong a lin deuh ving lai. Kawi Thawng nih voitam ngai laksawng a lak. Pakhatnak le pahnihnak hi ai cuh ziah. Nikhua a hung kal ziahmah. Kei le Mang Dun, That Cin tepawl hi cu kan lar lo taktak khi si. Kawi Thawng bel tu cu khual nungak nih a min theih an hun i zuam cio. A thawng pakhat lawng si lo. Kanmah lak ahcun a pumrua zong tha cem si. Zan tu ah tan kan la hna lai tiin kan riahbuk lei tu kan panh than. Mang Dun nih a hun coh pah in ‘Ka lung ka thlek kho ruam lo hi zeitin, That Cin nang nupi chiahru ngei bal ah, Dar Sui maw ka fut hnawh lai Par Te nu cu hme.’ That Cin nih sapherh a tam pah in ‘Aaa.. Atu bantuk caan ahcun, Par Te nu te hna cu ziah hme na hei fut hnawh len lai le hitluk khual nungak dawh Dar Sui Thantlang lawng hlah, Yangon tiangin a lar vemi i a mit laifang bak in an zoh komi cu, a ngaingai ti ahcun Par Te nu te hna thamtham cu khual pawl an tlung hnu tu ah na hei pal te ko hna lai cuh.’ Mang Dun lawng a rak si lo. Kawi Thawng hrimhrim cu, nungak pawl nih a min te hna Khup Luai sin ah a halmi an tam ial ti thawng a theih hoi nih dangkhat, Cin Cin nih Kawi Thawng an ka chuh sual lai tiah amah thiam tawk in a rak i tawmh ve. Kawi Thawng umkalnak hi a theih kho ngai rih fawn. A thin cu phang kho taktak khi si. Mang Dun zong hi Dar Sui nih khan a duh zoh zongin a zoh lai ka zum lo. Amah a va sawh tuk le Kawi Thawng laksawng a va lakpiak caah Dar Sui nih a mah laksawng ah a ruah biatu ah a rak zoh ve bia si lai tiin ka lungchung in ka chim pah ah, ‘Ka dua le van ti deuh uh! Rawl ei an tuah cang lai hih! Zan ah hibantuk cu kan tuak te lai tiah’ biatlang kawm bantuk phun in ka hun hnawt hna. Kawi Thawng le Mang Dun cu an kai ngai. An bat pah zawngah si kaw, an mit au a vaivuan cang. Mang Dun tu cu aa chawklehnak ah si deuh iau.

      That Cin cu lopher a kan pial taak. Nungak pawl sin ah rawl kheng pawl tuah le tawl ah aa zi len. Mipi pawl zong rawl a ei pah na, nau rawl a khaih pah na, ngakchia deuh pawl nih leiphut rak tuaitam pah na an si. Ruah lo piin ‘A ngamhmi pa chuak uh! Kawi Thawng nih Khamh Cung te pafa a hung singkhaw deuh ko hna.’ Kei le Mang Dun zong ready kan si tiphun in kan kiangkam lak awk tha poh kan ngiat. An pafa rual cun an hun nam lulhmalh. Kawi Thawng cu taksa tha, Pa thawng kan ti cu pakhat tete in cun an beng kho ruam lo caah an pathum bak in an hum bawmh ko. A huai cikcek hna. Mang Dun nih ‘Eh! Nan ngamh tih, Khamh Cung nau deuh Kil Luai a lu ah lung in a cumh colh.’ A thi le hnai he ai zi ko. Keitu cu cutluk pi in ka ri lo caah voikhat hnih cu kut ka thlak ve manh hna. Hriam le hrei cu ka dap hraw lo. Khamh Cung te pafa cu lo diam an zam. Mipi mit cu rawl einak pawng cu si kaw, kanmah lei ah an mit a vai deuh. ‘Ka nau le ka Puai lio a si i nan ka lawmhpi cu ka lawm tuk. Asinain khual he upa min ngei tampi zong an um, culak i hiti buainak nan hun chuakpi cu keimah nan ka tihzah lobia a si,’ Lal Dai nih thinhung nawn in a hun kan caak. ‘Aw, kan palh tuk. U Dai’ tiah lungfim bik ka si tiphun in ka leh. Cule cang ka, kan riahbuuk lei hoih in kan kal. Kan thin zong a hung ngai nih dangkhat, tunai bak kha Thantlang lei in mi a phan thar an um an ti i kan zu a kan phurh piakmi an i tel ti si caah kan i chiahtaak mi zong cu lungduh deuh in kan hun coh. Kan ningzak le mual kan pho kha cu Kawi Thawng caah a niam tuk rih. Anih cu cuhlan ah a buai pah lengmang mi a si tikah zei ah a rel lem lo. Nain khual lei nungak a rami pawl nih Kawi Thawng min Khup Luai sin an hlet  lengmang mi cu kan zetlan a theimi le a hun kan bihmi poh nih cun Khup Luai sin ah va kal than i a min theih an duh tukmi hmanh va let an duh deuh ving cang lai dah! Mi mit khi kan kem kho taktak.

      Thaizing lei cun sazawh ah a rami Lal Dai le Thlia Te an lunglawmhnak a hrawmpi mi khualei in nungak le tlangval si hna seh, Upa min ngei deuhdeuh zong an keneh thing zulh in kir an i zal ve cang lai. A donghnak zan a si caah nuamhnak (social) zong tuah lo cu Laimi kan sining ah Puai tlam a tling lai lo. Tlangval pawl bel an buai tuk te hnga maw tiah an ruah pah ko nain tuah lo taktak an siarem lo caah tuah an i tim. Ar sanpioh chuan ding ah chuangtuan pawl an hun fial than hna.

      Khup Luai ‘Atu cu kan thawknak a si ko lai nain hotal tal nih kan thatho nak ah rock lam in an kan lam piak kho lai maw? request khawh si hi tlangval pawl,’ a hun au ai. Mang Dun nih Dar Sui tihmanh thathi in a thiam lo buin ‘Dar Su ka request’ Luai Te a hun ti colh. A ban in an hun dawh len nain ‘keicu lam cu ka thiam lo hla tu kan sak piak te hna lai. Ka pawng i thumi ka hawinu nih ka chawng seh’ tiah jean bawngbi tet nawn in a hrukmi a hawinu cu a hei sawh. Kawi Thawng ‘Ee.. A dawh tung, Khi a pungsan hrim tha khawhning.’ a cilkadi dolh pah in a thli nawn in a ka chimh. Ningzah a thei pah lo bia maw a si hnga Puai ah kan ra ti i mahbantuk tuah lo cu a ti dek si lai a hung dir taktak ko. Kheset thang nawn in Khup Luai nih an hun chuak. a lam taktak hi cu a thiam kho taktak. Kawi Thawng le bang cu a mitci choi rua mitthep hmanh a hngal lo. Phek...phek..phek.. kan kut kan bengh piak dih cio. A rak lam lio ahcun Mang Dun nih caan tha ka lak tima si hnga a Dar Su pawng ah a rak thu manh iau. Kawi Thawng le Mang Dun kha an i chang. Dar Sui le a hawinu. Mang Dun nih a hawinu thutnak a hrawlh tik ah Kawi Thawng le Mang Dun kar a hei meet pah in a thu. A thli tein ka zoh pah tawn hna. Kawi Thawng cu a thlanhripi nih a paih ko cang. A zurit zong fim dih hlah maw ti awk in a um. ‘That Cin kha hei chim. Kan i chiahmi kha va la ta seh hi ka sii tha dih hih’ Kawi Thawng a hmai deuh ah ka thu caah ka hnakhaw kam ah a ka chim khawh. That Cin nih keimah a ka auh hmasa, kaa khat hnih ka hun hmawm ahkhin ka hung lut than. Kawi Thawng cu ka hei chim i a kal colh. Anih cu a ti kho ngai caah kaa li nga uak nawn in a coh khawh in a ra kai colh ve. A thutnak tu cu ka rak ven piak ve. Bia hna ka rak ruah pah lai ka ti cu a min fangfang ka hal manh. Kawi Thawng nih an ka chuh sual lai ti si ai cu voidang i hawihnu a dawn pengmi tutan cu a coh dih hlan in hlah maw a ra ti awk in a rang taktak khi si. Mang Dun le a a Dar Su cu an bia kaa a thaw ngamsam. ‘Ziah, Mang Dun khi a duhmi pei an lo ko khi’ tiah That Cin nih a hun ka thing. an hmailei ah seh ka thial ka ti i kaa thial taak hna. Kawi Thawng cu a sii tha um than cang caah a kaa hi a cip sual lo. an pali te cun an i chang hoi hna cu mu, puai ah an um le um lo hmanh an i hngal lomi khi a lo. Mang Dun a kaa cawl supmap. Ka zun ka zun ta lai ti si deuh rua. A chuak sin ah That Cin he kan hei zul. Wow.. tiah voikhat hrawng a au. ‘Zeitin sinpi pah hlah maw?’ That Cin nih a hun hal colh. ‘Kha si ko. Kha si ko. Kan nih te hna cu’ mah vial a chim ah a peh kho zokzok lo. Kan duh ve ko a ka ti a hun ti. A hnapduk zong tla dih rua ka ti a nuam tuknak ah. That Cin nih kan group chung i pakhat khat an chuak poh ahcun keimah rian a si tiphun in a thawl cu a hun thlir lengmang. Mang Dun nih kaa li nga a hun coh. Keicu ka coh pah lengmang caah kaa hnih ma ka coh. That Cin cu chim awk um lo a chiahtu le laktu cu si kaw a dinmi tam ial cang lai.

      Inn chungah kan hei lut. Ruah zong kan ruah bal lomi Dar Sui cu hlasak dingin a rak dir ko. Mang Dun nih thep loin a zoh. ‘Thaizing cun ka dawt kan tian cang lai. Then siang lo tiin tap hmanh ning law,’ hivial a sak ah, Mang Dun hnarno a tam. A kai pah caah a cal le a hnakhaw an sen ngai. Dar Sui zong a mithmai zoh ah a lawmmi cu a lo ruam lo. A aw zong a hung ther deuhdeuh. Mang Dun i va kal i hnamh phut a duh lai dah ka ti. Nain atu cu a tuan pah rih ko. Kan nuamhnak hmanh a dih rih lo hihnu ah caan tha ka zoh lai tiphun in a mitau le a hoiher in ka theih khawh. ‘Kan i lawm.’ Khup Luai nih a hun chim. Bia zong tlawmpal a hun hal hnik ko nain Dar Sui cu zokzok in Mang Dun lei hoih in rang nawn in a kal. Mang Dun sin a phanh sin ah an i tlaih colh. An kutsih a fek. Thinphang nawn ther nawn in an hun i zoh. Tuzan hi an mah kutchung ah um seh law dong ti loin an tlaih ding cu an i tlaihning le an i ngiathlai ning in ka theih khawh hna. Tlawmpal ka lu kan hun i her i Kawi Thawng a thutnak lei ka hei zoh. An thutnak cu a lawngpi in a um. That Cin he maw lengah an chuak hnga tiah That Cin cu ka hnulei ah a thu ve fawn. Ka lungchung in ‘awh!’ ka vun ti. Dar Sui hawinu, Hlawn Iang a thutnak  zong a lawngpi in a  um. ‘Ziah, kan chuakka ahkhan minung kan tam pah pei ka ti. Atu hi tlangval le nungak pawl an i zukphiak dih ko hita’ Khup Luai a thinhung nawn. A mawhlo hibantuk puai tuah caan i hruaitu nawl ngeih lo le minung tlawm tuk ahcun a bik in a kan hruaitu caah thil fawi a si lo cu mizei poh in kan theih cio. Nain a laih thei ve caah nuamhnak dangdang a kan tuahpi. Tha te hmanh in ka thu kho ti lo. A thli nawn in That Cin ka auh. ‘Kan kawl hna maw a hau ne lai zeitin’ ka hnu bak ah a thu caah a hna ah biathli chim phun in ka hei chimh. Liklak, a chuak colh. A hnu in ka zulh ve. Caan sau ngai kan kawl hna. Kan hmu kho ti hna lo. Atu hi zan khat ah Puai voihnih maw tuah hauh ne lai ka ti pah in a dong ma ceo ah biakinn tlang bo ah an thawngpang kan theih. A holhmi hi a dikthlir in kan theih dih. Dar Sui nih cun i Kawi Thawng laksawng a lak piak ruangah a rak zoh sawhmi ah kan ruahmi cu kan palh tuk ne ai ka ti. Then an i siang lo veve nak kong tiang in kan ngai ko hna. ‘Keicu kan khua ahhin um thai law ka duh ko. Siloah keimah tal nih in zulh i nangmah sin teah um ve hi ka duh bik ko.’ Mang Dun a aw ther nawn. That Cin nang i khuhter ka ti. A ngamh lo tuk buin keimah bia cu kan lak ah an ngai bik caah tih pah thlalau nawn in a hun i khuhter chih. ‘Aw, kaa hin maw nan rak um. Nanmah kan i kawl pah hna cu, Mang Dun hna a nu nih thaizing mi rian bawmh ding a si a ti i,’ ka lih le hrokhrawl in bia ka tawn.

Khatlei ah Kawi Thawng le  Hlawn Iang nih lengchuak i Mang Dun te phun ngaingai cun an um hraw lo nain Puai an um le um lo hmanh an i hngal fiang lo. Hnamh hrulhhrulh khi an i tim rua ka ti. Duhnak tiva hmete ah an rak pil manh ve hoi.  Mang Dun le Dar Sui bel cu tuni an zetlan zeihmi kong kha fiang deuh in fianh a duh caah si lai. Atu bantuk in biakinn bo ah hmun an la deuhnak le a daihnak deuh an i thim hi. Hlawn Iang nih Kawi Thawng tuni a zetlan kha a hmu manh lo ruangah annih pahnih cu puai ah a milu karh deuhnak ah tiphun in an rak i hlum pengnak  a si.

Khua zong a hungtlai ngai cang. Nazi 1:20 a luan deuh khi si. Puai zong cu Khup Luai nih donghter a hun timh. Nungak len caan zong a ngei kho ve ti ai lo tiah mipi pawl zong nih zei cukha an ti lo. Coka lei in nungak no le tlangval pawl nih (That Cin zong ai tel ve. Hibantuk hrim cu hrelh a duh lo.) sanpiauh a suak na, an suakcia a lak na, cite le hmathak a phawt na an si. Kawi Thawng le Hlawn Iang, Mang Dun le Dar Sui a tlang tete bak in kan hmai zawn ah an thu. An sanpiauh ei zong cite peih lomi bang khin a thawt kho taktak hna lo. Voidang i kai za deuh lo an ti tawnmi zong tuzan koko ahcun kumkhat chung a ti ti lo ding mithmai an keng. Zeiti tha vawlei hi cu duh a tling taktak lo. A bik in kan hawi le pahnih ca ko ah tiin ka lungchung in ka chim pah lengmang.

Mizong an tian uahmah hna. Khual lei nungak le tlangval pawl zong thaizing tlung cang ding an si caah tuzan tuan deuh in it ah a tha lai an ti rua, an hun i zukphiat dih cio. Dar Sui le Hlawn Iang zong cu an hawi le dang lawi i an nih um kha phun dang ah an kan ruah sual lai tiah Kawi Thawng le Mang Dun cu kan thlah uh tiah biathli an i chim lio ka mitsir in ka hmuh hna. Keizong hi tuzan cu That Cin nawl i cawn ning an thlah kar hna ah tiah khelbel pawl fim le tawl ah ka tho ve. That Cin le kan khua nungak upa deuh, ngakchia deuh, an tling dih ngawt, kan i bawm cio i khelbel tawl le inn thianhhlimh kan dih deng ahkhin Kawi Thawng le Mang Dun cu an hmailei hmanh zoh huam huaha loin kanmah lei ah a ra. An ngeihchia le an lungkuai tuk ti cu ka theih cia a si caah.Chawnh zong ka chawn lem hna lo. Kan dih bak in ‘That Cin, na thuhnak kan thei lo hih! kan zul ta.’ thang tuk loin ka au hnawh. Hrai khatnak ding cu an i fawih hme teh. An hun dolh thluahmah ko holh huaha loin langkhat kan lim manh. ‘A poi tuk ee. vanchiat maw si sungh zatlak ko hme. Duhmi le dawtmi he diriam te hmanh in tlongleng ti manh lo cu’ a tang a cum pah in Mang Dun a hun hram ruangmang. Zeiti hnemh awk cu ka thei ve hna lo caah, ‘Ka dua, minung cu caan nih a kan uk. kanmah nih kan uk hrim lo. Then caan a um bangin ton caan zong a um ti pei si kha, atu nan i then hi hmailei ah ton thannak lam a um lai tinak si ko. na lungrawk hlah.’ ka thiam hnihchun in ka hnemh. Kawi Thawng zong cu thiamthiam. Ka celh bak lo. ‘Dawt he  lenti caan te ah caan aw liam rih hlah’ a zuthawl dih cia hlawnh pah in cher lengmang in a hung i sa pah. Zeibia hlei in hmenh ding zong ka thei ve ti lo nih dangkhat, kan zuthawl zong That Cin te inn hnulei kan thuhmi dah ti lo a dih cang. Nazi ka zoh i 3:45 am bak si cang. ‘Khah! Kan lawi ah tha lai tuzan cu kanmah inn ah kan riak dih hna lai. That Cin kan hei sawm pah lai.’ ka thutnak in a hung dir pah in ka chim. An pahnih in an ban le ban in ka liangah an i bah. Lungfah zawng ahcun an timi a rak tam tuk hi teh tiah holh ti loin ka kal pi hna. ‘That Cin, tuzan cu kan in ah kan riak hna lai. Kawi Thawng hi ka chang hih.’ Sawn lengmang in hi zan cu lung le bo zong anmah umnak tiang um loin kan leh kan thal hna.