Ro

Liamcia kan pu, tleicia kan pi

Lunun hloh in, thisen man he

Miphun caah, thlaici tuhtu

Mitthlam nan cuang, ni sunglawi ah

Kan in hlam hna, nan tefa nih

Nan tuh thlaici, thei a par cang.

Nihin kan sin, bau ai kun uh!

Nan keneh dawh, zohchunh awktlak

Ro bang vui in, nan thazaang he

Nan ttialtakmi, philh khawh lo ding

Tuanbia dawhdawh, hla bia tthattha

Techin fapar, hmailei chan tiang

Nan fanau ca’h, hmun rih kun kaw

Tlawttlau loin, kan kilven lai

Hi nak sang in, karhter kan rian.

Nan kan rohmi, Laiholh Laica

Nunphung le laam, zatlang nun he

Hnipuan sungsung, kokek kutchuak

Kan kilkawi lai, fimtawl kan herh

Hmun camcin seh, hi kan rosung

Kan himter lai, tthangthar seino

Upa thlu lo, kan zulhdawi lai.

Miphun dang sin, Chin Miphun hi

Kan nauta lo, kan niam fawn lo

Bia le hla in, holh le ca tiang

A rum miphun, chim le rel zong

Kan dai bal lo, hmun kaakip ah

Kan izohthla, kan zahpi lo

Cuangter chin sih, Pupa Ro hi.

By Michael Pk
Note: 2015 CYO ah tuahmi Biazai tial zuamnak ah 1st ka ngahnak Biazai.