'Nunnak Sullam'

                      Bye..See Ya.. Hi5! Panh ngai in Dr. Smith le ka fanu te an hung chuak cuahmah. ka hei hmuh hna sin ah, anmah lei zulh in ka hei fuh hna. Dr. Smith nih 'chikhat te, bia chimh ding kan ngei. rak lut ta.' tiah a ka ti. Tuzing cu a nichuah ning zong ai dawh, van a thiang, nika te zoh ah mi lungthin a hliphlau ter, ngeihcia, lungkuai in a ummi zong hibantuk niceu sinah cun lawmhnak in an khat theo lai tiah keimah le keimah bia kaa ruah pah. Nizan i ka khuaruahmi bang in nihin hi Dr. Smith kan hmuh a donghnak zong si kho. Pehzulh in kan i thlai rih lai ni zong a si kho. Khatlei kam ahcun Kan i zuldawi caan zong a sau ruangmang ve cang. thlapa thla 4 pei si cang cu, tiin liamcia caan sin ah chikhat ka hung kir ta. Oh! 'Kafa chikhat te mu, rak thu chung kaa tehin, ka ra zau lai.' ka hei hmanh pah buin innkhan lei ahcun ka lut taak.Dr. Smith nih 'Hi' a van ka ti sin in, ka thinlung a lau, ka mitau a phing, ka lungtur thawng nih a hung rang deuhdeuh. Ka thawpi ka hun chuah pah in a mithmai ka zoh. A mithmai nih thil sining vialte a ka chimh dih. Thawngtha a si lai cu lungthli pel hmanh in ruahawk a um lo ding, ruahchannak a um tilo dingmi mihmai khi a keng. Kaa ruahter hramhram hmanh ah a si kholo. Abia cu a hun thawk. 'Na fanu te hi atu hnu thla 9 chung lawng.' a timi ka hna i a theih sinah ka lungthin muihnak nih a zelh i vawlei thil ka hmu kholo. Keimah le keimah hmanh ka hngal lo. Ka mitau a hung maw, ka hna tun a hung dai, cutin ka taksa zong nih zei an hung ther thluahmah. 'A nung ding a si lo. Cucaah, a thih hlan ah amah duhmi le a lung duhnak kha tuah piak na zuam bik a herh. A zawtnak hi cancer zong a si lo. Kan kawl lengmang nain kan hmu kholo. A fiangko mi cu na sinah zungzal a um kho ding a si lo. Aherh rihmi cu, a lungrawk ding in le ngaihchia in a nunnak hnga lo kha na zuam lai. Cuti, na tuah lo a si ahcun thla 9 hlan hmanh ah an kal taak khomi a si.' Hibia vialte hi a fiang huaha loin ka hna nih a ei khawhmi cu a si. Cun, ka theih dihka zongah ka mitthli a tla lo. Lungzur taktak in tap len zong ka lungah chuak lo. Dr. Smith zong ka hei nawl len fawn lo. Dai te tuin um kaa zuam. A ruangcu ka chunglei nih zeihmanh ruah khawhmi a ngei ti lo. Ka lung hi a kuai cikcek. Ka chunglei hi an lin dih. Tha le zaang zong ka ngei lo. Ka chunglei tha a ba pin ah ka lenglei zong nih a celh ve lo. Hi mitthli phen i ka thuhmi faknak hi honih dah a tuar kho hnga? Ka ruah deuhdeuh, ka chung thilri an maan dih rua tiawk in ka um. Anmah le an hmun cio zongah an um rua lo titluk in an i let dih. Nihin nikhua hi ka caah chunmui a tlung i ka zawh dingmi lam a ka phihtu ah an cang. 'Thank You' tiin kan ni a hung liam.

                 Minung nih kan ton hnga ding thil hi theihcia khawh siseh law hrial khawh a simi poh cu kan hrial cio hnga. A tha he tha lo he, kan theih khawh lo catu ah kan hmaika a phanh hnu ceo ah kan hngalh tawn. Mipakhat I a nunnak hi tlangsang cung i a par menmi pangpar bantuk taktak an rak si ko. Vawlei ah a duhmi thil hmanh diriam in a tuah manh lo ding, hawi le kom he lawmhnak zai hmanh a rel caan a tawi tuk dingmi ka fatu te amah mithmuh ah tap ka duh ballo. Hmaipanh tein ka um piak zungzal. zan a hngilh kar poh ah ka zoh i mitthli vanruah sur bang ik lengmang in ka tap. 'Na nu keimah lawng nan ka chiah hi na pa he kan hua tuk hna' tiin lungfah hrat ahcun tah hla ka lawh tawn. Bia tha lo zong ka kaa hin ka chuakter caan a tlawm lo. minung ka si ve bantukin. Na pa thih i Ka ngeihchia le lungkuai hmanh a dam hlan I hiti nangmah na hung si cu Ka caah vawlei hi sullam a ngei lo. keimah lawng nunchan hi thawtnamnak a um lo. Kan pathum tein van cungkhua umkhi kaa duh deuh ve tuk ta.' kafa. Asam ka muai pah in ka mitthli nih a hmai ah a tlak sual. Ugh!! Nunu, a hung ka auh, Ka chantling ka seh pah in, 'kafa i hngilh than thaizing sianginn kai ding na si khah!'. Caan rauh hlan ah a tlep than. Ka mit ka hung i hnuai. Khua caan ahcun pathian sinah vuivai bia ka chim tawn. 'Bawipa na fanu hi ka sual bik le ka chanbau bik ruangah maw hibantuk fahnak ka tuar kholo  ding thil, Ka phurh khawh lo ding thlirit Ka cungah na tlunter. ka palhnak ka ngaithiam ko. Atu ka fanu te cu kapa keimah caah chiah ko.' Thinlung kekkuai dihlak in thla ka cam caan hi a tam cang. Ka lungfahnak hi hnemtu ka tong lo. Hramhtu zong an um lo. Ka dawtmi ka va nih a luancia kum 4 hrawng ah vawlei umnak hmun in a kan dinh taak. Ring..Ring...Ring.. Kafa sianginn ah ka thlah.

                  Nikhua caan hi ka za lo. Nikhat a liam hi ka caah a rang hringhran. Ni fatin in ka fanu te he lengah kan chuak. hmunhma dawhdawh ah kan kal. Ka thinlung kaa damh bantuk ah a hung cang. Kanmah pahnih telawng kan si ko nain kan i nuam tuk. ka nuntha zong a hung dam deuhmi a lo. Ka fanu a sining ka zoh tikah, a thih lai a hngalhmi ko khi ka lawhter. A duhmi phun le kal a duhnak hmuhma hi a tam hringhran. A duhmi le a kal duhnak hmun le hma poh cu ka kalpi dih rua tiah ka ruah. Zan a ih hmanh ah ka hngilh hlan ah I hngilh hlah! 'Nunu ka ningtih' a ka ti. Ka si khawh tawkin a duhnak ka zul. Amah zong a lawm tuk  'nunu, nangmah bantuk nu ka ngeih cu vawlei cungah pathian nih a vantha bik ah a ka ser rua' tiah ka ruah a ka ti. Khatlei ka hoih i ka mitthli ka hnawh zokzok! Ka hnarno a ka tam. Kan dawt tuk kafa tihi voi thong cu ka chim cang lai. A caan a nai deuhdeuh, ka dawt ning a fak deuhdeuh! Zan kan it kar hna ah a ka kal taak sual lai maw tiah thinthi hmanh in kaa hngilh ballo. Ka mitkuh ka cim bal lo nih dangkhat, rawl ka ei kho bak lo. Der muihmai ka hung cuang thluahmah. Ka tha le zaang zong a hung dih ruahmah.Ka taksa le vun nih a hung langhter khun kaw, 'Kanu, na der tuk' tiah a ka ti tawn. 'Kafa, atu chan ahcun der dawh tlangval nih an uar cuh, an ngan zong a dam'. tiah capo pah in  ka hei leh. Ka fanu hi kum 5 lawng a si ko nain a lungfim tuk. ka lawmhnak bikcu amah hi a si ko. Nain ni zei maw zet hnu ahcun 'kafa' tiin auh ding a hei um ti hnga lo ding cu minung fa nih ruah kho ding a si lo. Keimah le keimah tu hi thazaang ka pek tawn. Ruachannak nganpi kaa ngeihter. Thla ka hung cam caan ahhin ka hirha a hung zaang tukmi a lo. Thaizing hi um ti loin nihin hi hmun zungzal seh law tihi ka duh.. 'Kanu, ka pawtam'. ihnak lei in a hung ka naihmi ka fanu nih ka khuaruahmi a ka dongter.

                          Ka fanu te cu ni dang lo bang dawh tein ka tamh. Thlalang chung ka i bih pah in a samte ka hriat piak cuahmah. Kafa ka zoh ahhin ka thinlung hi a kekkuai hringhran. Ka siang lo tuk ah, keimah hmanh a hlan ah thih khi ka ham deuh hnga. 'Kanu, ziah tuni hi na ka tamh ning cu voidang na ka tamh tawn ning a si lo. Hi na ka hruk termi hniphur rang le samkamh pangpar ummi zong ka ngei balmi si lo.' A mithmai le a biachim nih ka mitthli hi tla ko..tla ko. a fial in a ka fialmi ko a lo. ka celh lo. Ka tap thluahmah. Ka fanu te zong a mawh lo. Hniphur rang te le a sam ah pangpar a benhmi samkamh ka bunh. Amah theih loin ka rak cawk piakmi an si. Tuni hi a thar a hruknak zong a si lai i a donghnak a hruk zong a si fawn lai ti ka ruah ah ka thluak muru a fak. ka tha nih a ka therh dih. ka thazaang a dih. Ka ik pah buin, 'kafa, papa sinah vancung khua ah kal ding na si e.' ka duh lo. 'Atap thluahmah' Nunu, nangmah sin ah um ka duh ko. Papa cu a ka daw lai lo.' kafa 'nunu nih an dawt bantukin papa zong nih an dawt ve ko'. Nunu cu a ra ve te lai mu! Pappa umnak cu a nuam tuk bawipa nih a rak in don lai cu. keizong ka ra tikah papa he nan rak ka don lai mu rose pangpar te na rak i ken lai i, kafa dawt tukmi.' Kan pahnih in kan i kuh i kan tap thluahmah. Kan lungtur thawng nih vanki ko cul seh law ka lawhter.  Kan mitthli hi sullam thukpi in ngei hna seh ti ka duh. Ka mitthli tlak zat hin ka tuarmi faknak zong dam ve hna seh ti ka hei duh dah. Ka nute zong a tapnak ah a ba rua, caan rau lo ah daidep aa hngilh.. A pawng tein ka thuhnawh..

                        Suimilam tlawmpal hnu ah, a hngilhmi ka fa cu a tho ti lo. kafa 'Voi thong cu ka auh lai'. a ka leh ti lo. Ka kuh i ka tangah ka beh chih, ka tah thawng hi keimah lawng theih in ka tap rua ka ti ah, innpa chakthlang nih a ka zuanhnawh hnu ceo ah a rak thang tuk hita ka ti. Cutin a sam ka muai pah in tah hla ka lawh. Ka lungduh bia vialte chimh dih ka duh. 'Kafa, nunu nih kan dawt tuk. papa zong nih na ngakchiat lio te lawngah an hmuh ko nain an dawt tuk. keimah tluk tein na zawn an ruah. atu cu amah sinah khan naa ka kal taak cang mu! Papa kha nunu nih ka ngai tuk tiah va chim te mu. Nunu cu, keimah telawng ka hung um lai. nunnak hi ka caah zeidah sullam a ngei. zei ah dah hi ka nunnak hi nanmah loin sullam cu a um rua hnga kafa. Zeican tiang hen nan zuun hi ka tuar rih lai. thihnak thlanmual khi ka caah lamtha bik a si ko rua mu.' tiah biaza ka ruah. Ka tahnak Ka mitthli hi midang cungah lungtuai in a umtertu mitthli ko a hluan. Kafa ruak humh ah a ra mi minung hi an mitthli a pel te tal cu a tla lo an um lo. Ka vapa thih lio ahcun chungkhat le cingla rualchan deuh nih a rak ka tahpi nain atu cu ka fanu ngakchia te a si pin ah ka va nih a ka thih taaknak zong a sau tih lo, cu hlei ah ka va le kafa nih an ka thih taak ruangah si lai. A ka hmuhmi minung poh nih an zaang ka fak. Ka inntuarmi an ka tuarpi. A thlan ahcun pangpar tomte ka chiah pah in, Mang Tha.. kafa  'na pa sinah lungdai tein va din ai kun' tiin ka chim zawnah ka biahmanh a dong hlan ah, tah awthawng ka hlathlam in ka hung theih. ka lung ka hung i fim deuhdeuh. Ka hung cawl thluahmah. Maw, Pathian! ka pawng i a it mi nute naupa a hnuk hal tuk i a tah thawng a rak si ai, Hnuk ka pek i liklak, ka fanu te ihnak khan ah ka va lut. ka kuh i ka reh chih. kafa..kafa.. na tlau rua tiah ka ruah cuta. ka mitthli a hung tla. A tha lailo a hngilhmi thangh cu tiin ka hung dai deuh. 'Humm.. ka mitku vuai lo nunu' sianginn kai a ka thawh rua tiah a ka ruah. 'Nunu, It than ne.' ka hei hnamh i ka kal taak.

By Michael Pk