'Ka Nu Mitthli'

           Hello, hello.. ka aw na thei maw? voitam nawn ka chim len nain fiang hmanh in a rak thei thlu lo. ‘Kafa aw theih ka duh tuk na ti lengmang tung chawn ne hme.’ tiah a pawng ummi nih an hung raak len ka hei theih khawh. ‘Kafa aw a si lo midang ka chawnh rua’ tiah tarlei sang kan ti cu phone a pek hna. Kanu hi a mawh lo. A kum upa ve cang nih dangkhat, ka pa thihnak hi kum khat fai lawng a si rih nih dangkhat, ramleng ka chuaknak in voikhat te zong ‘kanu na dam maw? kan ngai tuk' tite zong ka rak ti bal lo. Kan khuatlang ka liam sin khan ka nu muihmai ka rak thlau. Mang tha can ah kan kut kan rak i tlaih sin khan, a ka dawtnak hmual a rak nung ti lo. Ka zuva, thisen in hringtu nu hmanh a hngal ti lomi, vawlei ah zeitin dah nuamhnak ka hmuh khawh lai ti lawng chun zan in a ruatmi, ka hmuhmi hnihkhat in din le ei hi ka caah thathnemnak a um bik ti thinlung put ngei in ka rak i serh. 'Na pa a thi e' an ti zongah, mah hngal loin zalam ah a vak lenmi, ihnak le ei awk hmanh tlamtling in a hmu bal lomi fapa tlau taktak ka rak si. 'Kanu na muthai cawknak ah' tiin phaisa tlawmpal te kuat cu chim lo chawnh zong chawn bal lomi ka sining hi, keimah le keimah cung hmanh ah, ningzahnak seipi khat kaa tlunhter. US um khuami le theih hngalh tete mithmai zong ka zoh ngam hna lo. Kaa phuhrung. A ka chawnh biak caan hmanh ah lungduh in bia hmanh ka ruah ngam hna lo. Aruang cu, ka nu nih hin khuami vialte hna sin ah ti awk in ‘pate nih hung ka chawn seh ka ngai tuk ee.’ tiah a rak cah peng hna. An ka chim ko nain ka hnakhat lei in ka ngai i khatlei in ka chuahter colh. A ngaingai ti ahcun Malay ka um lio in siseh, atu US ka phan hnu zongah ka nu caah hin phone card $2 man te hmanh hi cawk in ‘kanu kan ngai tuk ee. na dam maw’ tiin biaza a ruah khawh ding ka si ko nain nu dawtnak thlum ning kha ka dang ah a taang ti lo. Hlan lio kan inn chungkhar sining kha zanmang bang, niceu a hung chuah sin ah ruah awk thil hmanh ah ka rak ruat lo. Ka or ca tu lengmang ah ka mer tawn. Ka nu nih zeitluk harsatnak a ing kha ka rak philh diam. Thisen tampi chuak in a ka hrin kha, zeihmanh ah ka rak ruat piak lo. Upa awk a tlakmi kha niam tuk ah chiah riangmang in hnu ka chit taak. Hawi le kom he leng vak i, va din va ei, va sik va velh, nu kip he va tlawngleng  khi ka nunnak ah a nuam in ka rak ruat. Ni fatin in mah le mah hmanh i hngal loin ka ni caan an rak liam tawn.

                                   Fiang huaha loin a hung holh thluahmah. ‘Ka fa kan ngai tuk. na dam maw’? tiin a hung chimmi ka leh lai ka ti ah, ‘ziah na nu hi na philh cang

maw? Ka dawt tukmi, ka fahniang, na ka daw lo maw? na nu nakin an daw tu dang na hmu ti hnga maw? na pa um ti lo hnu i ka nun hi a fak tuk. Hmentu hi ka caah an um lo. Ka lilennak hmanh thlizil nih a choih dih rih lo. Ni khua caan sin ah a lo zau ding zong an si fawn lo. Cuchap ah nang nih le ram thatnak um fom cu ka zawn hi tlawmte hmanh na ka ruat rua lo. ka nu a um ti zong hi na hngal ti rua lo ka fa. Thong na tlak chung vialte na nu hi rawl ei loin thlaza kan cam piak. Zan ka it lai ah siseh, rawl ka ei lai tiang in nangmah hi a hmasa bik ah pathian sin ah kan ap tawn. Bawipa, ka fapa hi vawlei nuamhnak ah a pil sualnak hnga lo. Ngandam tein a um peng khawhnak hnga tiin ka mitthli he pathian sin ka hal caan hi a tam. Mikip sin ah ka fa nun dam tein a umnak hnga tiin thlacam ka cah zong hi a voi in rel cawk a si lai lo mu. Na caah ka mitthli hna zong hi fial loin a tlak caan a tam liangluang. ka thi le ka sa celh lo tiangin ka fa caah tiin rianhrang ka rak tuan tawn kha na mitthlam in na hun suai kho ti lo maw? Kannih cu hawi bang lo te inn chungkhar kan si kha, kan nunning kha nuamhnak ni hmanh kan rak hmu bal lo kha. Kan chungkhar sining cu na theih dih ko kha ta. Na lungfim a cu cang lo maw ka fa dawt’? Kan i chawnh le cangka in ka nu nih a lungchung um bia a hung chimmi pawl ka hna in ka theih i ka thinlung ah fawi tein an hung lut diahmah hna. Cusin ah ka mithmai le ka sining nih an hung langhter. Thinglung kekuai taktak in ka nu țah thawng nih ka nun a hung uaiter ziahmah. Ka sum len nain a tla zong ka hngal manh lomi ka mitthli a hung tawlh iahmah. ‘Kanu, zeithil poh hi keimah palh a si ko e. hung ka ngaithiam mu’. Ka aw ther nawn in ka hung chim. Nain a thin a dam kho rih lo. ngaihthiam hal in biaza ka chimmi hi a intuarnak nih a rak tei tuk caah a si. ‘Atu hi kan zan mang maw ka cang hen si. Ka fa na nu keicu sau zong kan nunpi kho ti lai lo. Phaisa kuat ding poh ah phone i chawnh a si lo ti cu, kan nih kan i fiang tuk ta. Na sin in phaisa tampi hmuh nakin na aw te ka theih khawh pengmi hi ka caah nunsaunak le lawmhnak a ka pe tu an si deuh tuk lai ta’. A hung peh rih. nain a thin a dam deuhmi a lo. A awkaa in țahnak aw le bia a pau ruam ti lo. Keimah tu hi ka lunghno thluahmah. Ka pa thih zong ka hngal lo. Lamkam ah sawn lengmang in ka rak vak men lio ka hung ruah ah ka nu sin ah ngaihthiam hal ding hi tampi ka ngei ko nain atu cu a ngeihchiat le lungfah liote a si caah tiin zei bia chim loin ka uam rih. 

                        

                                U le nau tam zong kan si lo. Ka nau le pahnih an si i an ngakchia ngai rih. Ka nu le pa nih cun keimah hi an ka bochan taktak. Upa bik kan ti fom cu, zeipoh ah keimah hi an ka rinh chanh. An ka rinhchanh tluk in le an ka bochan tluk in kei nih le zeihmanh cu ka si ve lo tikah ka nu le pa hmai hi ka khap ruam lo.

                  X’mas zingka si. Voidang ka lo lo. Ka panh kholo. Ka muisam a hninghno kho ruam lo. A kik pah ruang zongah si pah. Cupin ah, Hawidang fa le cu thil thar an i hruk hna lai. Sazawhnak ah an thil cu an i aih dih cio hna lai va si kaw,    Kei bel zei thilthar hruk cu chim lo muthai le khairiat bawlung cawknak hmanh khoika dah ka lak hnga. Ka nu le pa hal cu, hal lo he ai khat, an ngei lo ding cu 1oo ah 1oo in ka theih cia cang. Ka bawngbi aa belhnak hmanh um huaha ti lomi kai hruk rih lai. A hnulei khi mithman bantukin pahnih in ka nu nih a ka belh piaknak puanthan a lang sa ngai, Amah te hmanhmanh a caak le a rawp he sazawhnak ah ka va i hnur than lai cu tiin ka ihnak hmanh in ka tho huam lo. Buanbu ka khuh i khua za ka ruah salam. 'Malay tal ah kan ngeih lo chun in, docawi bu zongin ka nu le pa hauh hna ning law hmailei kong an ruah ahcun an ka sianh men ko lai dawkaw' tiah ka lung ah a hung chuak. A rau lo. Ka nu le pa kan inn chungkhar kan tling liote ah ka hauh hna. Kan tapkam ah mitthli veizat he ka nawl hnu hna ah, 'do tah kan cawi ko lai i na kal ko ne lai' tiah bia an ka kamh taak. An mawh lo. Ka nu le pa an ruah ve mi cu, kan khua ahhin cun, a har pawl kan si lai ti usih law kan palh lai lo. khuami hi an va țha tuk hrat le kan mual cu a va pho hraw lo i si ko. Ka pa Mizo ram kuli țuan ah a rak kal lio, kan nu farual in kan rak hmei caan i ei awk le din awk hmanh thitha in kan rak ngei huaha bal lo. Cu lio caan i ka nu a rak tuan ning le fa le caah tiin a taksa le thisen celh lo tiang in a rak i hnek ning. Laitlang lei cu, lo tuah hi kan pawcawmnak tha bik cu si kaw, ka nu cu kan mah lo a kal pah bu hin a lak kar tete ah mi lo ah thunh in a kal tawn. Zarhkhat ah kan lo voi thum a kal ahcun midang lo ah voithum a thunh tawn. Zarkhat chung ah pathian ni lawnglawng hi a din si. Pathian ni hmanh hi um hlah seh law a țuan țhiamțhiam ko hnga. Zanlei lolam tlung pah poh ah vokrawl caah tiin thingtlai le a hngah pawl, siloah fangvoi tibantuk pawl rit taktak in a phorh pah tawn. Thlanhri pi pawt in rian hrang kip a țuan ko zongah, Ka pa nih hecheh tiah Mizo ram ah thing ah a va hlawh ko bu zong hin sifah hi kan hrinmi, kan i chuahpi mi bantuk a cang. Sifahnak timi he kan i then kholo. Kan herhmi a tam bantuk in phaisa hmuh hi rak fawi ve seh law mi van te khi kan hai ruam hnga lo mu. Keimah sianginn thawh hmanh hi kan ngei lo caan a tam deuh. Kan arpi maw a hli hi kan zuar caan a tam ko cang. Kan inn chungkhar sining ruah ahcun vawlei hi a pit taktak ko. Van kan zoh kan ti ah a sang tuk hoi. Vawlei hi nuamhnak tling a um hrimhrim lo, sifah le nunhar  nih chum bang a kan zaam hnawh. Hnangamnak niceu zong kan hmu bal lo.

          'Na phone card a dih' computer nih mang țha hmanh kan i cah manh hlan ah a hung chim. Ka nu zong nih ka aw ngaih a cim lo. Keimah zong nih a ka țah hnawh le a ka chimhhrin ko bu hmanh ah ka cim kho ve lo. Leng va chuak i phone card va cawk than ding ah le khua a hung tlai ngai cang caah, hivial hin za ko ne seh tiin nungak tal chat ko ne ning tiah ka zau pah in ka lung ka hung i hrim.

By Michael Pk