'Laimi Phun Sunhsak Usih'

Hlan kan pupa hna nih, Lungkaam hin lo tein.
Mirang ral an rak doh, An dawt Chin ram caah.
An thisen tiang luang in, An nunak zong an hloh.
Kan ram caah an tem, An in tuarnak vialte.
Kan biakmi pathian nih, A philh hrimhrim hna lo.
Atu kan phanh ding caan, Feb 22 laimi ca’h cun.
Ni sunglawi caan duhnung, Laimi Phun Ni asi.

Puai sawhsawh nuamhnak ah, A hmanmi si loin.
Lai kan sinak langter in, Zalonnak kan hmuhnak.

Saltaangnak in kan chuah, Luatnak le mah tein.
Miphun pakhat sinak, An kan hmuhsak tertu.
Sunhsak awk tlakmi ni, Philh khawh lo ding caan.
Zeitik caan poh zongah, Kan nunak le thazaang.
Kan fimnak le thiamnak, kan pahrang chuah cio in.
Kilven kan herh zungzal, Laimi phun kan dihlak.

Hmailei caan chung zongah, Kan tuah peng ko lai i.
Laimi kan sinak cu, Kan langhter zungzal lai.
Pengkhat le Pengkhat kar, dawtnak a kan ngeihter.
Rem daihnak a chuahter, lungrualnak zong a phorh.
Laimi chungah pumkhat, Kan sinak zong fehter.
A hmun zungzal dingmi, Kan miphun pi ni ah.
Lunglawm thanuam tein, Hmang tti cio hna usih.

By Michael Pk

Note: Indiana Chin National Day ah tuahmi Biazai tial zuamnak ah ka ngahnak Biazai.